திருப்பரங்குன்றம் - பரங்கிரிநாதர்
குரம்பை மலசலம் - திருப்புகழ் அமைப்பு
தனந்த தனதன தனதன தனதன
தனந்த தனதன தனதன தனதன
தனந்த தனதன தனதன தனதன .... தனதான
சுரந்தி ருகுவலி இருமலொ டுறுகுளிர்
மிகுந்த தலைவலி பெருவயி றெரிகுலை
சுரந்த பலபிணி எதுவுமென் உடலினை .... அணுகாதே
தொடர்ந்து பகலிர வெனமறு சுழலினை
அடைந்து பலமுறை அயர்வுறு நிலையது
துரந்து நினதடி எனதிரு தயமதில் .... இடவேணும்
சிரந்த னிலிளைய மதியமும் வரநதி
கரந்தை அறுகுடன் அரவமும் முடிபவ
செறிந்த குழலுடை உமையவள் தழுவிடும் .... மணிமார்பா
சிறந்த லயமொடு கவிபல எழுதிடு
திறந்த னையுடைய புகலிய ரசுபணி
சிவந்த ழையவருள் இரசத சபையுறை .... பெரியோனே
நிரந்த ரமெமது படைகளும் உயிர்களும்
எனுந்தி மிரமொடு திரியசு ரரையொரு
நிமிர்ந்த அளவினில் எரியுற அருளிய .... திறலோனே
நெடுங்க டலிலெழு விடமதை மிடறினில்
ஒடுங்க அணிசிவ இமையவர் நலமொடும்
நெடும்பு கழினொடும் இலகிட வரமிக .... அருள்வோனே
பரந்த வெளியினில் எழிலொலி கழலினை
அணிந்து களிநட மிடுமுயர் குருபர
பதஞ்ச லியினொடு புலிபத முனிதொழும் .... இறையேநின்
பதந்தி னமும்நினை அடியவர் இருவினை
அதஞ்செய் அரகர வளமிகு பொழில்வளர்
பரங்கி ரியிலக மகிழ்வொடு மருவிய .... பெருமானே
பதம் பிரித்த வடிவம்:
சுரம் திருகுவலி இருமலொடு உறுகுளிர்
மிகுந்த தலைவலி பெருவயிறு எரிகுலை
சுரந்த பலபிணி எதுவும் என் உடலினை .... அணுகாதே
தொடர்ந்து பகலிரவு என மறுசுழலினை
அடைந்து பலமுறை அயர்வுறு நிலையது
துரந்து நினது அடி எனது இருதயம் அதில் .... இடவேணும்
சிரம் தனில் இளைய மதியமும் வரநதி
கரந்தை அறுகுடன் அரவமும் முடிபவ
செறிந்த குழலுடை உமையவள் தழுவிடும் .... மணிமார்பா
சிறந்த லயமொடு கவி பல எழுதிடு
திறம் தனை உடைய புகலி அரசு பணி
சிவம் தழைய அருள் இரசத சபை உறை .... பெரியோனே
நிரந்தரம் எமது படைகளும் உயிர்களும்
எனும் திமிரமொடு திரி அசுரரை ஒரு
நிமிர்ந்த அளவினில் எரியுற அருளிய .... திறலோனே
நெடுங்கடலில் எழு விடமதை மிடறினில்
ஒடுங்க அணி சிவ இமையவர் நலமொடும்
நெடும் புகழினொடும் இலகிட வரமிக .... அருள்வோனே
பரந்த வெளியினில் எழில் ஒலி கழலினை
அணிந்து களிநடமிடும் உயர் குருபர
பதஞ்சலியினொடு புலிபத முனிதொழும் .... இறையே நின்
பதம் தினமும் நினை அடியவர் இருவினை
அதம் செய் அரகர வளமிகு பொழில்வளர்
பரங்கிரியில் அகமகிழ்வொடு மருவிய .... பெருமானே
இரசத சபை - வெள்ளி அம்பலம்
புகலி அரசு - திருஞானசம்பந்தர்.
புகலி - சீர்காழியின் ஒரு பெயர்
புலிபத முனி - வியாக்ரபாதர்
