திருச்சிராப்பள்ளி
வண்ணப் பாடல்
சுகந்த குந்தளாம்பாள் - மட்டுவார்குழலம்மை
தனதன தான தனதன தான
தனதன தான .... தனதான
நரையெரு தேறி இறையவ ரோடு
நகரமு லாவு .... மகராணீ
நறைமலர் ஆரும் வரியளி சேரும்
நறுமணம் வீசு .... குழலாளே
பரிபுரம் ஆடு பதமலர் நாடு
பழவடி யார்கள் .... அவரோடே
படிறுடை நானும் இனியுற வோடு
படிமிசை வாழ .... அருள்வாயே
இருடிகள் வேள்வி தனையடு சூரன்
இடிபடு மாறு .... சமர்நீலீ
இபமுக னோடும் அறுமுக னோடும்
இனிதுற வாடு .... ஜகன்மாதா
திரிபுரம் வேவ ஒருகணை யேவு
சிவனிட மாரும் .... எழிலாளே
திருமுறை வேத எதிரொலி மோது
சிரகிரி மேவும் .... உமையாளே
பதம் பிரித்த வடிவம்:
நரை எருது ஏறி இறையவரோடு
நகரம் உலாவு .... மகராணீ
நறைமலர் ஆரும் வரியளி சேரும்
நறுமணம் வீசு .... குழலாளே
பரிபுரம் ஆடு பதமலர் நாடு
பழ அடியார்கள் .... அவரோடே
படிறு உடை நானும் இனி உறவோடு
படிமிசை வாழ .... அருள்வாயே
இருடிகள் வேள்விதனை அடு சூரன்
இடிபடுமாறு .... சமர் நீலீ
இபமுகனோடும் அறுமுகனோடும்
இனிது உறவாடு .... ஜகன்மாதா
திரிபுரம் வேவ ஒருகணை ஏவு
சிவன் இடம் ஆரும் .... எழிலாளே
திருமுறை வேத எதிரொலி மோது
சிரகிரி மேவும் .... உமையாளே
No comments:
Post a Comment