39. வண்ணப் பாடல் - 12 - திருமுதுகுன்றம் (விருத்தாச்சலம்)

ராகம்: ஹிந்தோளம்
தாளம்: அங்க தாளம் - 4 + 6 (தகதிமி தக தகதிமி)

தனதன தனன தான தனதன தனன தான
 தனதன தனன தான தனதான

உயரிய மறைக ளோதி ஒளிமிகு மலர்கள் தூவி
 உனதிரு வடியை நாளும் நினைவோரின்
உறுதுயர் இடர்கள் யாவும் உலையிடை மசக மாகி
 உறைவிடம் எதுமி லாது கடையேறும்

இயலிசை நடனம் ஆரும் இனியவ! எழிலு லாவும்
 இளமதி முடியின் மீது புனைவோனே!
இருளினை அரியும் ஞான ஒளிமிகு நினது பார்வை
 எளியவன் எனது மீதும் விழவேணும்

நயமொடு நமசி வாய எனநிதம் நவிலு வோர்கள்
 நலமுடன் இனிது வாழ அருள்வோனே!
நரைஎரு தினிலு லாவி! நகுதலை உடைய வீர!
 நடுநிசி யினிலெ ஆடும் அயிலோனே!

முயலகன் முதுகின் மீது களிநட மிடும கேச!
 முதலிடை முடிவி லாத பெரியோனே!
முயலொடு கயல்க ளாடும் முகில்வரை பரவு சோலை
 முதுகுவ டமரும் ஆதி இறையோனே!

உலை - கொல்லனின் நெருப்பு
மசகம் - கொசு (சிறிய பூச்சி என்னும் படி)
நகுதலை - பிரம்ம கபாலம்
குவடு - குன்று
முது குவடு - முதுகுன்றம்

பாடலைக் கேட்க:
https://drive.google.com/open?id=1OIRHPLogXr2vaPylN0HXPysf7GWP9t8g